Марий Эл Кугыжаныш пого министерство коллегийын заседанийыштыже эртыше ийысе пашам иктешлыме да тенийлан задачым рашемдыме. Тушто Марий Эл правительстве председательын алмаштышыже Евгений Курмаев лийын.
Кугыжаныш пого министерстве кучемын бюджетым пойдараш полшышо
ик тӱҥ органжылан шотлалтеш, каласен министр Алексей Плотников. 2023 ийыште регионын собственностьыштыжо улшо пого ден мланде участкылам кучылтмо да ужалыме деч республик бюджетын доходышкыжо 247,3 миллион теҥге пурен, тыге бюджетлык заданий кок пачаш утлалан шукталтын.
Министерствын пашаштыже шуко йочан ешлан, СВО участник-влаклан да льготан моло гражданлан мланде участкым пуымо кӱлешан корнылан шотлалтеш. Черетым кораҥдышашлан, республикыште илыше-влакын кумылыштым шотыш налын, тидын шотеш оксам ойырымо йӧнат кучылталтеш. Тудын кугытшо 268,5 тӱжем теҥгеш шуэш. Ты окса дене мланде участкым налаш але ипотекылан тӱлаш лиеш. 2023 ийыште СВО участник-влаклан сад участкым черет деч посна собственностьыш яра пуымо йӧнымат темлыме.
Кодшо ийын Марий Эл вуйлатыше Юрий Зайцевын кӱштымыж почеш Кугыжаныш пого министерстве Ялозанлык да кочкыш сату министерстве да район администрацийла дене пырля республикысе ялозанлык мландым тӱрыс шотлымо инвентаризацийым эртареныт. Тыге чумыржо 702,92 тӱжем гектарым шотлен лукмо, но тушечын 59 процентше гына ялозанлык кӱлешлыклан кучылталтеш. Сандене 2024 ийлан тыгай задачым шындыме: пайдаланаш йӧршӧ мландым ялозанлык оборотыш кычкаш, а начар мландым чодыра фонд категорийыш кусараш.
Заседанийым иктешлышыла, Евгений Курмаев тӱҥалме чыла тиде пашам умбакыже шуктен толаш кӱлмым палемден.
Марий Эл вуйлатышын пресс-службыжын уверже негызеш Ю. Исаков ямдылен
