Тений кеҥеж каныш жапыште Марий Элыште илыше 30 тӱжем утла икшыве лагерьыште канаш да тазалыкым пеҥгыдемдаш тӱҥалеш.
Республикым вуйлатыше Юрий Зайцев видеоконференций йӧн дене Россий Федераций правительстве председательын алмаштышыже Татьяна Голикован эртарыме совещанийышкыже ушнен. Тушто регион-влакын 2024 ийысе кеҥежымсе кампанийлан ямде улмыштым каҥашымаш лийын.
Российын вице-премьержын палемдымыж почеш, тений кеҥежымсе лагерь-влак шукырак йочам авалтышаш улыт. Ты гана каныме верлаш 5,3 миллион ӱдыр-рвезым колташ палемдыме, нунылан чумыр налмаште 39,7 тӱжем лагерь пашам ышташ тӱҥалеш.
Марий Элыштына тений 202 тыгай кумдыкым почаш ямдылалтыт, тушто чылаже 31 тӱжем наре йоча канен кертеш. Тидыже ӱмашсе деч 16 процентлан шукырак. Школ пелен 178, ола деч ӧрдыжтӧ 20 да палаткан 4 лагерь пашам ышташ тӱҥалыт. Нуным жапыштыже почаш ямдылалтме паша план почеш эрта.
Тидын дечын посна 160 икшывылан Волжскысо рӱдӧ эмлымверын санаторийыштыже канаш йӧн уло. «Артек», «Орлёнок», «Океан», «Смена» всероссийский йоча рӱдерлаш 200 наре ӱдыр-рвезым колташ палемдыме.
Неле илыш ситуацийыш логалше 12 тӱжем утла икшывыланат кеҥеж годым канаш да тазалыкым пеҥгыдемдаш йӧн ышталтеш. Начар тазалыкан 530 ӱдыр-рвезылан 4 инклюзив сменым эртарат.
Марий Элнан йоча лагерьлаштыже Россий Федерацийын вес субъектлаж гыч йоча-влак канаш тӱҥалыт: 350 – Белгород, 150 – Запорожье да 100 – Оренбург областьла гыч.
Кеҥеж каныш жапыште тыгак школ лесничестве-влак пашам ыштат. Йоча-влаклан походыш, экспедицийыш каяш йӧн лиеш. «Икымше-влакын толкынышт дене пырля Марий кеҥеж» фестиваль кышкарыште каникул мучко кудывечылаште тӱрлӧ мероприятий-влак эртаралташ тӱҥалыт.
Тений кеҥежым йоча-влаклан канаш да тазалыкым пеҥгыдемдаш йӧным ышташ 78 миллион утла теҥгем ойыраш палемдыме.
Марий Эл вуйлатышын пресс-службыжын уверже негызеш Г. Кожевникова ямдылен
