«Марий Элын профсоюз организаций-влакын объединенийышт» ушем тений Первомай демонстрацийым эртарен огыл. Пайрем вес сыным налын.
1 май. Йошкар-Ола. Сеҥымаш парк. «Единый Россий» партийын Марий региональный отделенийжын секретарьжын икымше алмаштышыже, Марий Элысе Профсоюзын председательже Александр Майоров, Йошкар-Оласе отделенийын секретарьже, регионысо исполком вуйлатышын пашажым жаплан шуктышо Антон Волков, тыгак Профсоюз ушемын чолга еҥже-влак Тылын труженикше-влаклан шогалтыме стеле дек пеледышым пыштеныт.
10 шагатлан автопробегыш 20 автомашина тарванен. Нуно Йошкар-Ола уремла мучко кудал эртеныт.
ХХХ
27 апрельыште Йошкар-Олаште, В.И.Ленин лӱмеш тӱвыра полатыште, «Пашан еҥже-влак» («Люди труда») республиканский профсоюз конкурсым иктешленыт. Ныл номинацийыште: «За преемственность поколений», «Стабильность, творчество, качество», «За созидание и долголетие в профессии», «Молодые профессионалы» – сеҥыше-влакым саламленыт.
Конкурс тӱрлӧ сферыште тыршыше пашаче еҥым мокта, тудын шонымашыже – пашаште шумо сеҥымаш дене палымым ышташ, передовой опытым шараш, самырык-влакым экономикым нӧлталме секторыш ушаш, еш паша традицийым тукым гыч тукымыш шуяш.
Тений Шернур, Марий Турек, Кужэҥер, Волжский, Морко, Килемар, Оршанке, Юрино, Звенигово районла да Йошкар-Ола гыч 26 лауреат профессиональный конкурсыш ушнен.
Марий Эл вуйлатыше Юрий Зайцев Еш идалыкыште «Марий Элын эн сай паша династийже» знакым учредитлен. Тиде знакым да сеҥымашым пеҥгыдемдыше дипломым династийын эн кугу ийготанжылан идалыклан ик гана кучыктат. Молыштлан кажныжлан, тичмаш идалык пашам ыштымек, 1000 теҥге пуалтеш.
Марий Эл правительстве председательын икымше алмаштышыже Михаил Васютин конкурсым иктешлыме годым республикым вуйлатыше лӱм дене паша пайрем дене саламлен да кандаш ешлан тауштымашан серышым кучыктен. Палемден: калык тукым гыч тукымыш шуйналтше паша династийым поснак пагала.
«Марий Элын эн сай паша династийже» икымше чап лӱмым «Шойбулакский» племзавод гыч Яндулинмыт династий сеҥен налын. Нунылан 100 тӱжем теҥгеаш сертификатым кучыктымо, увертара Марий Элын Профобъединений ушемын сайтше.
Л. Семемнова
