Марий Эл вуйлатыше Юрий Зайцев ден Сбербанкын Юл-Виче банкшын председательже Александр Анащенко паша дене вашлийыныт да пырля ыштыме йодышым каҥашеныт.
Республикым вуйлатыше палемден: Сбербанк Марий Эл правительствын кугу кӱлешлыкан шукертсе партнёржылан шотлалтеш, тудын дене пырля тӱрлӧ отрасльыште цифран ончыл технологийым кучылтман проект илышыш пурталтеш.
Александр Анащенко республикын правительствыж дене пашам пырля ыштымым кӱкшын аклен ойлен да ешарен: Сбербанк цифровой трансформацийлан таче кугу тӱткышым ойыра да республикыште туризм, тазалыкым аралымаш, образований дене кылдалтше икмыняр проектым илышыш пурташ йӧным ышта.
Вашлиймаште тунемме учрежденийлам вашла кутырен келшыме негызеш чоҥымо нерген йодышым каҥашыме. Марий Элыште кугыжаныш ден частный организаций кокласе партёр кыллан эҥертен, Килемар районысо Кого Пӓмйӓлыште общеобразовательный школ да Йошкар-Олаште «Синяя птица» школ чоҥалтыт.
Тазалыкым аралыме отрасльым цифроватлыме йодышеш посна шогалме. Республикысе 4 медицине учрежденийыште СберЗдоровье медицине компаниий деч пациент-влаклан дистанционный мониторинг комплексный программе дене келшышын 228 тонометр кучылталтеш.
Вашлиймаште тыгак кундемым комплексно вияҥдыме, пашаче вийым ешарен толмо да кӱлешан моло йодышым каҥашыме.
Марий Эл вуйлатышын пресс-службыжын уверже негызеш Ю. Исаков ямдылен
